КӮЛОБ. Дар доираи Соли баланд бардоштани масъулияти шаҳрвандӣ. Дар маҳаллаи И. Ҷумаев бо сокинон бахшида ба фарорасии 22-солагии Рӯзи Ваҳдати миллӣ мулоқот баргузор гардид.
Мудири шуъбаи кор бо занони Кумитаи иҷроияи ҲХДТ дар шаҳри Кӯлоб Мунаввараи Бозоралӣ, мутахассиси САҲШ-и шаҳри Кӯлоб ва дигар шахсони даъватӣ иштирок ва суханронӣ намуданд.
Мунаввараи Бозоралӣ қайд дошт, ки Ваҳдати миллии тоҷикон ганҷи бебаҳоест, ки бо ранҷу машаққати зиёд ва гузашта аз он, дар натиҷаи ҷонбозиву қурбониҳои ҳазорон нафар фарзандони фидоии миллат ба даст омадааст. Аз ин рӯ, мо вазифадорем, ки барои татбиқи ғояҳои он талош карда, бо мақсади эҳёи арзишҳои миллӣ ва тавсеаи тафаккури давлатдории миллиамон, ки асоси пешрафти Тоҷикистони азиз мебошад, сарҷамъона кору фаъолият намоем.
Дар идомаи суҳбат дигар иштирокдорон баромад намуда, изҳор карданд, ки Ваҳдати миллӣ воқеан, яке аз ҷашнҳои таърихӣ барои халқи азизи мо бисёр муҳим мебошад, зеро он давлати ҷавону соҳибистиқлоли тоҷиконро аз хатари нобудӣ ва миллатро аз парокандагӣ раҳо намуд ва ибтидои раванди барқарорсозии харобиҳои ҷанги таҳмилӣ ва созандагии Ватани маҳбубамон гардид.
