ВАХШ. Дар доираи Соли баланд бардоштани масъулияти шаҳрвандӣ. Дар ташкилоти ибтидоии «Тоҷикистон»-и ҷамоати шаҳраки Киров оид ба самтҳои афзалиятноки фаъолияти ҲХДТ вохӯрӣ доир гардид.
Вохӯриро раиси Кумитаи иҷроия ҲХДТ дар ноҳияи Вахш Одилҷон Маҳмадов оғоз намуда, дар бораи дастуру супоришҳои мақомоти болоии ҲДТ ба таври мухтасар суханронӣ намуд. Мавсуф инчунин, дар бораи фаъол гардонидани шаҳрвандон ва ҷалби бештари онҳо ба соҳибкорӣ, хоҷагидорию кишоварзӣ ва корҳои хоҷагию ҳунарҳои мардумӣ ба хотири паст кардани шиддати бекорӣ ва фаро гирифтани сокинон бо шуғл ва ба дарки ҷомеа расонидани моҳияти хизмат дар сафи Артиши миллӣ ҳамчун мактаби ҷасорату мардонагӣ ва омили асосии нигоҳ доштани сулҳу суботу амнияти кишвар андешаронӣ кард.
