ҲАМАДОНӢ.Бо ибтикори Кумитаи иҷроияи ҲХДТ дар ноҳияи Мир Сайид Алии Ҳамадонӣ ва шуъбаи Кумитаи давлатии амнияти миллии Ҷумҳурии Тоҷикистон дар ноҳия ҳамоиш таҳти унвони «Терроризм ва экстремизм вабои аср» гузаронида шуд.
Дар ҳамоиш узви Кумитаи иҷроияи вилоятӣ ва ноҳиявии ҲХДТ, раиси ноҳия Одиназода Бозоралӣ Неъмат, сардори шуъбаи Кумитаи давлатии амнияти миллӣ дар ноҳия Сафоев Абдусафо, прокурори ноҳия Салимзода Дилшод, сардори ШВКД-и ноҳия ва раиси Кумитаи иҷроияи ҲХДТ дар ноҳия Давлатҷон Ғаффорзода иштирок ва баромад намуданд.
Ҳамчунин дар ҳамоиш имомхатибони масҷидҳои ҷомеаи ноҳия, раисони Кумитаҳои маҳалла, муассисаи таълимӣ, падару модарони шахсоне, ки дар гурӯҳҳои ифротӣ аъзо ҳастанд ва аъзои намлояндагии ТҶҶ «Созандагони Ватан» иштирок намуданд.
Раиси Кумитаи иҷроияи ҲХДТ дар ноҳия Давлатҷон Ғаффорзода қайд кард, ки истилоҳи терроризм аз калимаи лотинии «Terror» сарчашма гирифта, маънояш тарс ва ваҳм аст.
Террористон мехоҳанд, ки мақсаду мароми худро бо роҳи зӯроварӣ, куштор ва тарсу ваҳм амалӣ созанд. Террор кардан ин ҷомеаро ба ҳолати тарсу ваҳшат ва ноумедӣ афкандан аст. Мутаасифона, терроризму экстремизм дар замони мо хусусияти ҷаҳонӣ касб карда, ҳизбу ҳаракатҳо ва созмонҳое мебошанд, ки кӯшиш менамоянд мақсаду маром, ғояву андеша, афкор ва нақшаҳои худро ба ҳар роҳу васила ва ҳатто бо усулҳои ғайриинсонӣ ба амал оварда, кишварҳои ободу пешрафтаро ба харобазор табдил диҳанд. Тибқи баъзе маълумотҳои оморӣ айни замон дар ҷаҳон 500 ТЭТ арзи ҳастӣ доранд. Омилҳои мусоидаткунандаи терроризм ва экстремизм пеш аз ҳама бар хурди манфиятҳои абарқудратҳо бошад, дигар осебпазир будани афкори ҷомеа ва масъалаҳои иҷтимоӣ нуҳуфтааст.
