ВОСЕЪ. Тибқи нақшаи баргузории хонишҳои сиёсӣ дирӯз дар ташкилоти ибтидоии МНДСЭ (СЭС)- и ноҳия Восеъ бо иштироки раиси Кумитаи иҷроияи ҲХДТ дар ноҳияи Восеъ Сафарова Ҳафиза, мудири шуъбаи таблиғот, иттилоот ва матбуоти Кумитаи иҷроия Гулрухсор Мирзоева ва мутахассиси шуъбаи таблиғот, иттилоот ва матбуоти Кумитаи иҷроия Ситамова Роҳила хониши сиёсӣ баргузор гардид.
Зимнан Сафарова Ҳафиза оид ба самтҳои афзалиятноки фаъолияти хизбӣ, муқовимат бо коррупсия ва муборизаи оштинопазир бурдан дар роҳи решакан кардани омилҳои асосии он ва ташкилотҳои террористиву экстремистӣ ҳамчун омили хатарнок дар ҷомеа, сазовор ҷашн гирифтани 30- солагии Истиқлолияти Ҷумҳурии Тоҷикистон суханронӣ намуд.
Ҳамзамон Гулрухсор Мирзоева ҳамаи ҷамъомадагонро бахшида ба санаи муҳими таърихӣ Рӯзи Парчами Ҷумҳурии Тоҷикистон ва кушодашавии аввалин чархаи НБО-и Роғун табрику таҳният гуфта, қайд намуд, ки бо мавриди баҳрабардорӣ қарор гирифтани чархаи аввали НБО-и Роғун эҳтиёҷоти дохилии кишвар ба нерӯи барқ ба пуррагӣ таъмин гашта, Тоҷикистон ба яке аз кишварҳои азими содиркунандаи нерӯи барқи сабз табдил меёбад, ки эътибору шуҳрати Ватани азизамонро баланд бардошта, мавқеъи онро дар арсаи ҷаҳонӣ боз ҳам мустаҳкам мегардонад.
