Муроҷиатнома ба муносибати эълон гардидани иқдоми ҳизбӣ таҳти унвони “365 рӯзи ободонӣ, созандагӣ ва бунёдкорӣ” бахшида ба 35-солагии Истиқлолияти давлатии Ҷумҳурии Тоҷикистон
Ҳамсафони азиз!
Фаъолон, аъзо ва ҷонибдорони Ҳизби Халқии Демократии Тоҷикистон!
Сокинони шарафманди вилояти Хатлон!
Бо мақсади иҷрои дастуру супоришҳои Асосгузори сулҳу ваҳдати миллӣ-Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон, ки дар Маҷлиси васеи Кумитаи Иҷроияи Марказии Ҳизб 17 июли соли 2025 ироа гардиданд, бо қарори Маҷлиси Кумитаи иҷроияи Ҳизби Халқии Демократии Тоҷикистон дар вилояти Хатлон таҳти № 11 аз 14 августи соли равон, аз 1-уми сентябри соли 2025 то 1-уми сентябри соли 2026 дар вилояти Хатлон бо ташаббуси Кумитаи иҷроияи Ҳизби Халқии Демократии Тоҷикистон дар вилояти Хатлон иқдоми ҳизбӣ таҳти унвони “365 рӯзи ободонӣ, созандагӣ ва бунёдкорӣ” ҷиҳати истиқболи сазовори 35-солагии Истиқлолияти давлатии Ҷумҳурии Тоҷикистон роҳандозӣ мегардад.
Ҳадафи асосии ин иқдом боз ҳам вусъат бахшидани корҳои ободонию созандагӣ, ватанпарастӣ ва эҳёи арзишҳои миллӣ мебошад. Мо бо ин ташаббус мехоҳем тавассути саҳми аъзои ҳизб, соҳибкорони ватандӯст, шахсони саховатманд ва фаъолони ҷомеа барои рушди деҳаю маҳаллаҳо, таъмини ниёзмандон, ободии муассисаҳои иҷтимоӣ ва беҳбудии муҳити зист саҳм гузорем.
Мо шуморо даъват менамоем, ки дар амалисозии ташаббусҳои ҳизбӣ: сохтмон, таъмиру азнавсозии муассисаҳои соҳаи маориф ва тандурустӣ, бунёди коргоҳу корхонаҳои истеҳсолии саноатӣ бо таъсиси ҷойҳои корӣ, дастгирии ятимону маъюбон ва ниёзмандон, роҳандозии шанбегиҳо ва аксияҳои тозагӣ, сабзу хуррамгардонӣ, гулзоркунии гулгашту роҳравҳо, боздид аз шароити буду боши афсарону сарбозон, баргузории чорабиниҳои сиёсӣ-фарҳангӣ дар қисмҳои низомӣ, аёдати собиқадорон, тозагии оромгоҳҳо, роҳсозӣ, кашидани хатти об, чароғонкунии кӯчаю хиёбонҳо, таъмиру азнавсозии пулу дарвозаҳои даромадгоҳҳои шаҳру ноҳияҳо ва тозагии заҳбуру заҳкашҳо фаъолона ширкат варзед.
Аз фаъолон, аъзо ва ҷонибдорони Ҳизби Халқии Демократии Тоҷикистон, инчунин аз сокинони заҳматқарин, обрӯманд, саховатпеша, бонангу номус ва шарафманди вилояти Хатлон даъват ба амал оварда мешавад, ки дар татбиқи иқдоми Кумитаи иҷроияи ҲХДТ дар вилояти Хатлон таҳти унвони “365 рӯзи ободонӣ, созандагӣ ва бунёдкорӣ” бо ҳисси баланди масъулият иштирок намуда, дар пешрафту шукуфоӣ ва ободии Ватани маҳбубамон- Тоҷикистон саҳми арзанда гузоред!
