Хуштар зи китоб дар ҷаҳон ёре нест,
Дар ғамкадаи замона ғамхоре нест.
Ҳар лаҳза дилам аз ӯ ба гӯшаи танҳоӣ,
Сад роҳате асту ҳаргиз озоре нест.
АНДЕША. Пайдоши китоб ба пайдоши хат ва забон вобастагӣ дорад. Китоб дар ҳама давру замон муаррифгари халқияту миллатҳо мебошад. Инсон метавонад, тавассути хондани китоб аз адабиёту фарҳанг сиёсату иқтисодиёти мамолики ҷаҳон бархӯрдор мегардаду ҷаҳонро бо тайёраи андеша сайр менамояд. Ҳамин аст, ки устод Абдураҳмони Ҷомӣ китобро «Фурӯғи субҳи доноӣ» ба қалам додааст.
Аниси кунҷи танҳоӣ китоб аст,
Фурӯғи субҳи доноӣ китоб аст.
Дар асрҳои гузашта асарҳои мутафаккирони барҷастаи мо дар рӯи чӯб, санг, сафол, барги дарахтон, устухонҳо ва пӯсти ҳайвонот навишта шудаанд. Пас аз истеҳсоли қоғаз хушнависони мо асарҳои бузургонамонро иншо намуда, аз насл ба насл мерос гузоштаанд. Дар давраи Сомониён китобхонаи калони давлатӣ бо номи «Ганҷинаи ҳикмат» арзи њастӣ дошт.
Бо мурури замон ва пешрафти техникаю технология шумораи китобу китобхонаҳо зиёд шудааст. Ҳамарӯза тариқи нашриётҳои давлатӣ садҳо китобҳо нашр мешаваду ба рӯи хони маънавии мардум гузошта мешавад.
Мақоле ҳаст, ки мегӯянд, «ганҷ магир-китоб гир» зеро ҳама ганҷи дунё мераваду китоб як умр боқӣ мемонад. Халқи тоҷик аз он миллатҳоест, ки ба китоб эҳтироми бузург дорад. Аз ҳамин сабаб сафи китобу китобхонаҳои электроние, ки бо шабакаҳои интернетӣ пайваст аст, дар маркази таваҷҷуҳи ҷавонон қарор дорад. Ба даҳсолаи пеш назар афканем, ҷавонон нисбат ба китоб хунукназарона рафтор мекарданд.
Моро зарур аст, ки инкони маърифатро чун гавҳараки чашм покиза нигоҳ дорему ба наслҳои ояндаи худ боқӣ монем, то ки барои омӯхтани фарҳангу маданияти миллати худ танқисӣ накашаду фарҳанги мардуми хешро гум накунад.
Сатторов Шариф, мудири шуъбаи омори Кумитаи иҷроияи ҲХДТ дар н.Вахш
