АНДЕША. Дароз кардани дасти кумак ва иҷрои корҳои хайру сахо яке аз нишонаҳои ҷавонмардии ҳар як инсон ба ҳисоб меравад. Дар ҷомеа ҳастанд нафарони дорое, ки мехоҳанд баҳри дастгирии аҳолии камбизоат кумаки худро мунтазам расонанд. Дар даҳаи якуми моҳи шарифи Рамазон аз ҷониби оилаи Қодирзодаҳо ба 400 нафар сокинони камбизоат, ятим ва эҳтиёҷманд 50 кг орд, 5 кг қанд, 5 литр равған, 5 кг биринҷ, 2 кг гӯшт ва ғайраҳо дода шуд. Амалҳои хайри ин оила мунтазам ба мардуми ҳамин ҷамоат ва ноҳия мерасад. Ин оила дар иҷрои корҳои ободонӣ, сохтмони бинои нав барои муассисаи таълимии деҳа, кандани чоҳи амудӣ, сохтмони иншооти варзишӣ назаррас мебошад. Чунин ашхос барои рушди деҳот ва саҳмгузорӣ дар ҳар як гӯшаи диёр азму талоши ҷиддӣ намуда, таъкидҳои Асосгузори сулҳу ваҳдати миллӣ- Пешвои миллат муҳтарам Эмомалӣ Раҳмонро ба ҷо меоранд.
Мо мардуми Тоҷикистон садҳо ҳазор маротиба шукри Худо гуфта, ин неъмати соҳибистиқлолро пос медорем ва ба Ваҳдати комилли мардуми Тоҷикистон арҷ мегузорем. Маҳз натиҷаи чунин сарҷамъии мо ҳаст, ки имрӯз фарзандони бонангу номуси ҳар як деҳа барои иҷрои корҳои ободонию созандагӣ, расонидани дасти кумак ба оилаҳои эҳтиёҷманд масълияти хешро эҳсос менамоянд.
Мо мутасаддиёни Кумитаи иҷроияи ҲХДТ дар ноҳияи Восеъ дар ин муддат зиёда аз 243 вохӯрӣ, хонишҳои сиёсӣ 40 адад, семинар машваратҳо 12 адад, аксияҳо 37 адад, шанбегиҳо 12 адад гузаронида иштирокчиёнро бо Барномаҳои ҳизбӣ ва иҷрои амалҳои хайру саховат, ободонии диёр даъват намудаанд.
Дар саҳифаи Кумитаи иҷроияи ҲХДТ дар ноҳия “фейсбук” ҳамарӯза оид ба фаъолияти Кумитаи иҷроияи ноҳиявӣ ва дигар чорабиниҳои баргузоршуда маълумот гузошта мешавад. Инчунин, дар шабакаи “ютюб ” низ саҳифа кушода шудааст, ки дар он наворҳои аксияҳои ҳизбӣ ва дигар чорабиниҳо пахш мегарданд.
Аз аъзои ҲХДТ дар ноҳия хоҳиш карда мешавад, ки ҳангоми иҷрои амалҳое, ки ба манфиати ҷомеа мебошанд, ҳатман маълумотҳои худро бо аксҳояш ба унвонии Кумитаи иҷроияи ҲХДТ дар ноҳия ирсол намоянд. Инчунин, бо дастгирии онҳо мо аз иҷрои корҳои ободонию созандагӣ аз тамоми деҳаву маҳаллаҳо бохабар мегардем.
Кумитаи иҷроияи ҲХДТ дар ноҳия доимо миёни мардум буда, ҳатто чорабиниҳои баргузорнамудаи мардуми деҳот ва маҳсули дасти ҳунармандонро низ иниъкос менамояд.
Сафаралӣ Мирзоев, муовини раиси Кумитаи иҷроияи ҲХДТ дар ноҳияи Восеъ
