Эй баҳори сабзу тар, хуш омадӣ, хуш омадӣ,
Эй ҷамоли баҳру бар, хуш омадӣ, хуш омадӣ.
Аз қадамҳоят ҳама гул мекунад,
Эй арӯси гулбасар, хуш омадӣ, хуш омадӣ.
АНДЕША. Диёри нозанини мо боз ба баҳори оламафрӯз қадам мегузорад, боз чаҳ-чаҳи булбул ва шилдироси ҷӯйбор ба гӯш навои дилнишине мерасонад. Аз тантанаҳои айёми бедоршавии табиат – баҳори зиндагӣ, баҳори дилкушо ба кас рӯҳу илҳоми тоза мебахшад. Наврӯз достони зебоист, табиат, ҷомеа, ақл, эҳсос ва амсоли ин аз такрор нерӯманд мешавад. Наврӯз ҷашни табиат буда, ҳангомаест, ки рӯзгори куҳан зиндагиро аз сар мегирад ва ба мавҷудоти олам ҳаёти нав меёбахшад ва соли ҳақиқӣ даврае аз адвори хешро ба поён расонида, вориди марҳилаи тозае мегардад. Наврӯз ҷашни эҳёи мавҷудоти гетӣ буда, танҳо покию сафо ва хуррамию фаровонӣ меоварад.
Оре, Наврӯз қарнҳои дароз бар ҳама ҷашнҳои ҷаҳон ҷилва мебахшад, ҷашни ҷаҳонию, ҷавонию шодмонист, ҷашни замину офтоб аст, шӯр заданҳову ҷӯши шукуфтанҳо, саршор аз нури шукӯҳи оғоз аст. Дар ин фасли зебо шабу рӯз баробар мешавад.
Наврӯзи Аҷам, ту ҷашни миллат ҳастӣ,
Ту рамзи салоҳу сулҳу ваҳдат ҳастӣ.
Дар ин суханон як олами маъниҳост,
Бар мардуми мо бахту саодат ҳастӣ.
Бояд гуфт, ки Наврӯз таҷлили хотираи бузургест. Хотираи ниёгони бузург ва мо низ дар ин рӯз тамоми корҳои маснӯиро пушти сар мекунему азизони хешро ёд меоварем. Мо тавассути Наврӯз аз нав зиндагии ҷисмонию рӯҳонии хешро таҷлил мекунем ва дар домони табиат аз файзи заминию осмонии он лаззат мебарем ва чеҳраи мо аз шодмонӣ мешукуфад .Чунон ба назар мерасад, ки тамаддуни маснӯии қарни мо ҳар қадар печидатару сангинтар гардад, ниёз ба бозгашт асту бозшинохти табиатро дар вуҷуди мо рангинтар мекунад ва аз ин ҷост, ки Наврӯз бар хилофи дигар суннатҳову ҷашнҳо, ки тавонотар мешавад, ҳар сол дурахшонтар мегардад.
Дар ин фасл занону ҷавондухтарони мо куртаҳои адрасу чакан ба бар карда, дар чорабиниҳои ҷашнӣ иштирок менамоянд ва бо расму русуми миллии тоҷикӣ барои оростани дастархони идона, аз ҷумла суманакпазӣ, таомҳои миллӣ ва рамзи наврӯзии ҳафт сину ҳафт шин омодагиҳо дида, бо рақсу сурудҳои дилнишин Наврӯзро ҷашн мегиранд.
Аз фурсати муносиб истифода бурда, тамоми мардуми шарифи Тоҷикистонро ба ҷашни Наврӯзи байналмилалӣ табрику муборакбод мегӯям.
Эй боли пари озод, Наврӯз муборак бод,
Эй субҳи дили обод, Наврӯз муборак бод.
Афсонаи рангинро, ин ҳастии ширинро,
Бар рӯи шумо бикшод, Наврӯз муборак бод.
Қурбонгул Раҷабзода, мудири шуъбаи кор бо занони КИ ҲХДТ дар вилояти Хатлон
