АНДЕША. Бо ташаббуси Кумитаи иҷроияи марказии Ҳизби Халқии Демократии Тоҷикистон аз 1 то 6 марти соли 2021 курси бозомӯзӣ дар мавзӯи “Оиннома ва Барномаи Ҳизби Халқии Демократии Тоҷикистон - меҳвари фаъолияти ташкилоти ҳизбӣ” барои раисони кумитаҳои иҷроияи ҲХДТ аз шаҳру ноҳияҳои ҷумхӯрӣ баргузор гардид.
Курси бозомӯзии мазкурро муовини якуми Раиси Ҳизби Халқии Демократии Тоҷикистон Абдуҷаббор Азизӣ ифтитоҳ намуда, бо маърӯзаи “Омилҳои расидан ба ҳадафи олии Ҳизби Халқии Демократии Тоҷикистон “Барои рушди устувори иқтисодӣ ва зиндагии шоистаи мардум” дар вилоят, шаҳр ва ноҳия-дастурҳо дар асоси нуктаҳои Паёми Пешвои миллат” баромади пурмуҳтаво намуданд. Мавсуф зимни баромад оид ба мақсаду ҳадафи курси бозомӯзӣ, ҳалли масъалаҳои ҳамарӯзаи ҳаёти мардум, корҳои дохилиҳизбӣ, натиҷаи гузаронидани маъракаи муқоисакунии аъзои ҳизб, кор бо занону ҷавонон, мубориза бар зидди гурӯҳҳои ҳадафашон нопок ва омодагӣ ба ҷашни 30-солагии Истиқлолияти давлатии Ҷумҳурии Тоҷикистон бо далелҳои мушаххас баромад намуданд.
Ҳамзамон, суханрониҳои Абдуҷаббор Раҳмонзода ёрдамчии Президенти Ҷумҳурии Тоҷикистон оид ба рушди иҷтимоӣ ва робита бо ҷомеа дар мавзӯи “Инъикоси масъалаҳои иҷтимоӣ ва робита бо ҷомеа дар Паёми Президенти мамлакат” оид ба масъалаҳои маориф, тандурустӣ озмунҳои ҷумҳуриявии “Фурӯғи субҳи доноӣ китоб аст”, “Тоҷикистон-Ватани азизи ман” ва “Илм фурӯғӣ маърифат” басо ҷолибу саривақтӣ мебошанд.
Умуман, ҳамаи маърӯзаву баромадҳо ва таҳлилҳо аз ҷониби олимону муҳаққиқон ва коршиносони воломақому намоён ба монанди президенти Академияи миллии илмҳои Ҷумҳурии Тоҷикистон Фарҳод Раҳимӣ, корманди Шӯрои амнияти Тоҷикистон Фозилҷон Сайдализода, корманди Маркази тадқиқоти стратегии назди Президенти Ҷумҳурии Тоҷикистон Фирӯз Равшаналиев, муовини Раиси Ҳизби Халқии Демократии Тоҷикистон Асрор Латифзода, роҳбари дастгоҳи Кумитаи иҷроияи марказии Раиси Ҳизби Халқии Демократии Тоҷикистон Абдураҳмон Хонзода ва дигарон дар мавзӯҳои мубраму муҳими сиёсӣ, маърифатию фарҳангӣ басо муҳим, саривақтӣ ва муъҷаз буданд. Ҳар яки ин маърӯзаву баромадҳо дар донишу маърифати сиёсию фарҳангии шунавандагон нақши муассир доштанд.
Бояд қайд намоям, ки бахусус боздид аз НБО Роғун, ки тибқи дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир карда шуд, бароямон басо хотирмон ва диққатҷалбкунанда буд. Аз қабули роҳбарияти шаҳри Роғун ва меҳмоннавозии онҳо хеле хушамон омад. Ҳамзамон, бо шароити кории Кумитаи иҷроияи ибтидоии ҶСК “Роғун” шинос гардида, аз тарзи корбарӣ, ҳуҷҷатдорӣ, муҷаҳҳазгардонии утоқҳои корӣ аз наздик дидан намуда, аз таҷрибаи ҳамдигар баҳсу андешаронӣ намудем.
Лозим ба ёдоварист, ки Ҳизби Халқии Демократии Тоҷикистон сарпарасти маънавии НБО “Роғун” мебошад ва ҳатман ҳизбиён саҳми худро дар бунёди ин иншооти азим мегузоранд.
Қисмати аз ҳама асосӣ дар боздиди ин иншоот аз рафти корҳои сохтмонӣ шинос шуданамон буданд. Боиси ифтихор аст, ки мо аз наздик ин Кохи нурро дидан намуда, бо кормандони он, бо қисматҳои гуногуни неругоҳ, агрегатҳо ва рафти корҳои сохтмонӣ маълумоти зиёде гирифтем.
Ташкили чунин як саёҳати дастаҷамъона аз иншооти муҳими аср, ки маҳз бо дастури Пешвои миллат ба вуқӯъ пайваст, бояд минбаъд низ дар чунин чорабиниҳо идома дода шавад, зеро на ҳама имкон ё шароити ба чунин мавзеи ҷолибу муҳим саёҳат карданро дорад ва барои мо шунавандагон ин бор фурсати басе муносибе насибамон гардид.
Зимни курси бозомӯзӣ бахшида ба Рӯзи Модар конференсияи ҷумҳуриявӣ дар мавзӯи “Бонувон дар меҳвари Паём” дар Осорхонаи миллӣ баргузор гардид, ки барои мо занони роҳбар суханрониҳои хотирмону самимии Хайриниссо Юсуфӣ муовини Раиси Ҳизби Халқии Демократии Тоҷикистон, Дилрабо Мансурӣ муовини раиси Маҷлиси намояндагони Маҷлиси Олии Ҷумҳурии Тоҷикистон, Ҳилолбӣ Қурбонова – раиси Кумитаи кор бо занон ва оилаи назди Ҳукумати Ҷумҳурии Тоҷикистон ва дигарон дар бораи баланд бардоштани мақому манзалати занон дар ҷомеа таассуроти нек бахшид.
Дар бораи занону бонувони шинохтаву обрӯманди тоҷик андешаронӣ намуда, суханони пурмуҳтавои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро қайд карданӣ ҳастам, ки дар зимни яке аз суханрониҳояшон таъкид доштанд: “Фарзандони тарбия кардаи модари тоҷик ҳоло бо заҳмати бунёдкорона ва ташаббусҳои созандаашон давлати соҳибистиқлол ва Ватани аҷдодиамонро обод карда, макому манзалати Тоҷикистони соҳибихтиёрро то рафт баланд бардошта истодаанд”.
Оре, ҳоло 8 нафар зан узви Маҷлиси миллӣ ва 15 нафар бону вакили Маҷлиси намояндагони Маҷлиси Олии Ҷумҳурии Тоҷикистон мебошанд ва теъдоди вакилзанон дар маҷлисҳои вакилони халқи шаҳру ноҳияҳо ва дигар корҳои роҳбарӣ хеле афзудааст.
Курси бозомӯзӣ амсоли дарсҳои сиёсатшиносиву фарҳангӣ ва маърифатие буданд, ки сатҳи дониши моро боз ҳам мустаҳкам ва қавӣ гардониданд. Ҳар яки мо шунавандагон як ҷаҳон таассурот, навигарию бозёфтҳои ҷолиби зиёдеро бардошт намудем, ки ба мо имкон медиҳад, ки дар фаъолияти ҳизбиамон самаранок истифода намоем.
Абдусаломзода Мунаввара, раиси Кумитаи иҷроияи ҲХДТ дар ноҳияи Кӯшониён
