Дар ҷавонӣ саъй кун, гар бехалал хоҳӣ амал,
Мева бенуқсон бувад, чун аз дарахти навбар аст.
А. Ҷомӣ
АНДЕША. Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон дар айёми ҷавонии худ ба арсаи сиёсат ворид гардида, як миллати парешонгаштаро сарҷамъ намуда, биёбони сӯхтаеро ба биҳишти рӯйи дунё табдил доду ба оламиён муаррифӣ намуд.
Худи ман парвардаи даврони сулҳу ободии Ватани азиз бошам ҳам, аз таърихи ин миллати азияткашида огаҳам, ҳар вақте ки бо аҳли оила якҷо менишинем падару модарам он давраи сангинро нақл мекунанду аз чашмонашон ғайричашмдошт об мерезад. Падарам, ки дар он давра низ омӯзгор буданд, мегӯянд: “ Ҳангоми баргузории Иҷлосияи шонзадҳум тамоми сокинони мамлакат интизорӣ мекашиданд, ки тақдири миллат чӣ мешуда бошад. Он вақт на ҳамаи ҳамдеҳагонамон оинаи нилгун доштаанд ва ҳамагон дар назди як телевизион ҷамъ шуда будему интизор ва ҳеҷ гоҳ фаромӯш намесозам, ки чӣ гуна вақте аввалин бор ба саҳна баромаданд, сар ба зону зада, парчами давлатиро бӯса карданд, ҳоло сухан накарда, ҷамъшудагон аз ҷой бархоста, ашки шодӣ мерехтанд ва аввалин суханронии ин ҷавони умедбахш ба мардуми ноумед ҷони дубора бахшид”.
Пешвои муаззами миллат дар баробари тарбияи насли ояндасози кишвар, фарзанди номваре тарбия намуданд, ки дар вуҷудашон хислатҳои ботамкинию сарбаландӣ эҳсос мешавад. муҳтарам Рустами Эмомалӣ бо ору номуси бегазанди тоҷикона, бо ҳисси ватандӯстию садоқат ба халқ дар ҳар вазифае, ки интихоб шудаанд фаъолияти худро нишон дода, талош варзидаанд, ки обурӯю нуфузи кишварро дар арсаи байналмилал баланд бардоранд.
Ба зебогии пойтахти азизамон шаҳри Душанбе назар меафканему ба шаҳрсозии шаҳрдор муҳтарам Рустами Эмомалӣ аҳсан мегӯем. Раиси Маҷлиси миллии Маҷлиси Олӣ интихоб гардидани муҳтарам Рустами Эмомалӣ ба мо ҷавонон руҳияи тоза бахшид, зеро интихоби роҳбари ҷавон ба ин вазифаи пурмасъулият шаҳодати он аст, ки Ҳукумати мамлакат ба ҷавонон эътимоди қавӣ дорад. Мо ҷавонон ҳангоми ёд кардани савгандашон назди халқ шоҳиди он гаштем, ки Рустами Эмомалӣ, Рустами Достони ин замон аст.
Расулов Ғолиб, мудири шуъбаи кор бо ҷавонон ва занони Кумитаи иҷроия ҲХДТ дар ноҳияи Ёвон
