КӮЛОБ. Дар доираи ҷадвали тасдиқшуда, Кумитаи иҷроияи ҲХДТ дар шаҳри Кӯлоб баргузории вохӯрию мулоқотҳо дар корхона, муассиса, ташкилот ва деҳаю маҳаллаҳои шаҳр оид ба расонидани нуктаҳои Паёми навбатии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва расонидани ҳадафҳои созандаи ҳизб ташкил ва роҳандозӣ карда истодааст.
Вобаста ба ин дар ташкилоти ибтидоии ҳизбии “И. Сомонӣ -3” бо аъзо ва ҷонибдорони ҲХДТ маҷлис баргузор гардид.
Дар кори маҷлис узви Кумитаи иҷроия, директори генералии муассисаи давлатии Муҷтамаи ҷумҳуриявии осорхонаҳои шаҳри Кӯлоб Ҳотам Раҷаби Асозода, корманди масъули Кумитаи иҷроияи ҲХДТ дар шаҳри Кӯлоб Валиева Саъбагул, ҷонишини ректори ДДК оид ба илм ва инноватсия – Рафиев Сафархон ва раиси ташкилоти ибтидоии ҳизбии “И. Сомонӣ-3”, вакили Маҷлиси вакилони халқи Ҷамоати деҳоти Кӯлоб Салимов Нурулло ширкат доштанд.
Иштирокдорон қайд доштанд, ки дар Паёми имсолаи худ, ки аз санаи 26.01.2021 бар меояд, Президенти кишвар муҳтарам Эмомалӣ Раҳмон доир ба ҳамаи паҳлуҳои иқтисодиву иҷтимоии кишвар суханронӣ намуда, барои боз ҳам беҳтар намудани сатҳи зиндагии мардуми кишвар аз ҷониби Роҳбари давлат ба мақомотҳои дахлдор дастуру супоришҳои мушаххас дода шуд. Дар ин самт моро зарур аст, ки ҷиҳати дар амал татбиқ гардидани дастуру супоришҳои Пешвои миллат, ки аз Паёмашон сарчашма мегирад, саҳмгузорӣ намоем.
