Н.ХУСРАВ. Дар доираи Соли шинохти бештари манфиатҳои миллӣ. Имрӯзҳо таваҷчуҳи асосии аҳли ҷомеаи шаҳрвандӣ ба пешгирӣ ва табобати бемории коронавирус равона шуда бошад ҳам, дар ҳамаи навоҳии кишвар марди деҳқон дар баробари андешидани тадбирҳои судманд оид ба пешгирии ин беморӣ, ба парваришу рӯёнидани зироатҳои гуногуни киштнамудааш, ҳамзамон бо ҷамъоварии сабзавоту меваҷот ва ғалладонагиҳо машғул мебошад ва аз файзу баракати ҳосили ба даст овардааш рӯзгори худро таъмин менамояд.
Даъватҳои зарурӣ ва саривақтии Сарвари давлат муҳтарам Эмомалӣ оид ба самаранок истифода бурдани ҳар як ваҷаб қитъаи замину рӯёнидани ду-се ҳосили зироат ва захираи дусолаи озуқавориро аҳли заҳмати ноҳияи Носири Хусрав сармашқи фаъолияти ҳаррӯзаи худ қарор дода истоданд. Имсол ҳосили зироатҳо ва меваҷот нисбатан хеле хуб мебошад.
Масъулини Кумитаи иҷроияи ҲХДТ дар ноҳияи Носири Хусрав бо мақсади шиносоӣ бо фаъолияти хоҷагии мазкур бо кормандони хоҷагӣ суҳбату вохӯрӣ баргузор намуданд.
Хоҷагии деҳқонии «Васила», ки сарварии онро деҳқони асил сокини деҳаи Олтинсой Тошбеков Мусулмон ба уҳда дорад соли ҷорӣ хеле соли бафайз омад. Нашъунамо ва ҳосили зироату меваҷот хеле хуб буда, аъзои хоҷагӣ имрӯзҳо ба ҷамъоварии мева ва зироатҳои полезӣ машғул буда, бозори дохилиро бо меваҷоту маҳсулоти кишоварзӣ ғанӣ гардонида истодаанд.
Қитъаҳои замин дар ин хоҷагӣ устокорона ва бо як маданияти баланди заминдорӣ ба роҳ монда шудааст, ки аз дидани он завқи касро меорад. Аъзои хоҷагӣ дар масоҳати 2 гектар боғи интенсивии парвариши ангури навъи пешпазаки ранга, аз ҷумла сафеду сиёҳро бо шароити иқлими тафсони водии Бешкент мувофиқ гардонида бунёд намуд, ки имрӯз ҳосили дилҳоҳ дода истодааст. Ҳамарӯза тоҷирон дар ноҳия ва бозорҳои ноҳияҳои Шаҳритузу Қубодиён ҳосили ба даст овардаи ин хоҷагиро ба савдо бароварда, бозори дохилиро таъмин намуда истодаанд.
Хоҷагии мазкур ҳар сол ҳосили дилхоҳ мегирад. Аҳли заҳмати хоҷагӣ, инчунин ба парвариши зироатҳои полезӣ помидор, бодринг, тарбузу харбуза ва зироати пахта машғул мебошанд.
Дар вохӯрӣ сарвари хоҷагии мазкур Мусулмон Тошбеков иброз намуд, ки суханрониву даъватҳои Пешвои миллат муҳтарам Эмомалӣ Раҳмон оид ба пешгирӣ аз беморӣ руҳафтода нашудан аз ин ҳолат, воқеан аҳли деҳот бахусус мо кишоварзонро руҳу илҳоми тоза бахшид, Ҳар як сокини деҳот эҳсос намуд, ки дар ҳама ҳолат аз дастгирии давлату Ҳукумат ва Сарвари кишвар баҳраманд хоҳанд шуд. Бо эътимоди қавӣ самимона аз пайи кору фаъолият шуда, баҳри рӯёнидани ҳосили баланди неъматҳои моддӣ ҳастем.
