ҶАЙҲУН. Дар доираи Соли шинохти бештари манфиатҳои миллӣ. Вобаста ба пешгирӣ аз паҳншавии бемории коронавирус ва истифодаи самараноку мақсадноки қитъаҳои заминҳои наздиҳавлигӣ, ҳамчунин заминҳои вобасташуда масъулини Кумитаи иҷроияи ҲХДТ дар ноҳияи Ҷайҳун дар деҳаи Фотеҳони Ҷамоати деҳоти Ваҳдати миллӣ бо усули «хона ба хона» чорабинии ҳизбӣ доир намуда, бо аҳолӣ ҷиҳати пешгирии ин вирус суҳбату вохӯриҳо доир намуданд.
Дар ин росто ба сокинон варақаҳои тарғиботӣ оид ба пешгирӣ аз ин вабои аср тақсим карда шуда, масъулин дар раванди вохӯриҳо ба сокинон таъкид намуданд, ки гигиенаи шахсӣ, тозагии маҳали зистро риоя карда, дар ҷойҳои серодам аз ниқоб истифода бубаранд. Сипас, вобаста ба дастуру супоришҳои Роҳбари давлат муҳтарам Эмомалӣ Раҳмон дар самти истифодаи самараноки замин ба хотири таъмини амнияти озуқавории кишвар суханронӣ карда шуда, ба сокинон барои татбиқи ҳадафи сеюми кишвар Стратегияи таъмини амнияти озуқаворӣ тавсияҳои судманд дода шуд.
