ДӮСТӢ. Дар доираи Соли шинохти бештари манфиатҳои миллӣ. Корҳои фаҳмондадиҳиро оид ба пешгирӣ аз сироятшавӣ ба коронавирус кормандони масъули Кумитаи иҷроияи ҲХДТ дар ноҳияи Дӯстӣ вусъат бахшида, ҳамарӯза дар корхонаҳо ва ташкилоту муассисаҳо ва деҳаву маҳал варақаҳои таблиғотиро дастраси сокинон гардонида истодаанд. Инчунин, ҳангоми тақсимоти варақаҳои иттилоотӣ таъкид намуда истодаанд, ки ягона роҳи наҷот аз ҳамагуна бемориҳои сироятӣ, ин риояи гигиенаи шахсӣ, тозагии маҳал, истеъмоли ғизои солим ва ба варзиш машғул шудан мебошад. Дар ин раванд аз ҷониби масъулин ба сокинон дар бораи истифодаи самараноки заминҳои наздиҳавлигӣ бахотири таъмини амнияти озуқаворӣ, ҷалби ҷавонону наврасон ба китобхониву донишандӯзӣ ва корҳои фоидабахш маслиҳатҳои судманд дода мешавад.
