АНДЕША. Суботу амнияти кишварамон ва устувории ҷойгоҳи он амнияту осудагии марзҳои давлатии Ҷумҳурии Тоҷикистон барои ҳар як фарди ватанпарвар арзиши хеле муҳим дорад. Имрӯзҳо буҳрони эпидемӣ, аз қабили коронавирус дар минтақаҳои гуногуни дунё ҳукмрон шуда, иқтидори иқтисодии аксари давлатҳои ҷаҳонро суст ва ба буҳрони иқтисодӣ оварда расонид. Давлатҳое, ки хуруҷи вирус дар онҳо тез паҳн гардид, хизматрасониҳои тиббӣ ва дастгириҳои молиявӣ дар самти хизматрасониҳоро дар давраи хуруҷи фавқулодаи коронавирус оҷилан ба мардум расонида натавониста, ба мушкилот рӯ ба рӯ шуданд.
Қайд намудан бамаврид аст, ки давлати Тоҷикистон дар шароити мушкилоти марбут ба паҳншавии глобалии коронавирус тадбирҳои оҷилӣ андешида, дидбонгоҳҳои назоратӣ, санитарию беҳдоштиро дар сарҳадот ташкил намуда, дар он ҷо карантин эълон гардида, ба он нигаронида шуд, ки вирус ба кишари мо ворид нагардад. Ҷуноне ки мо шоҳид ҳастем, дар як муддати кӯтоҳ зиёда аз 7 ҳазор шаҳрвандон аз давлатҳои хориҷа ба Ватан баргашта, ба карантин фаро гирифта шуданд. Бо мақсади баланд бардоштани огоҳсозии ҷомеа, риояи талаботи санитарию беҳдошти фардӣ ҳамарӯза системанок дар қаламрави ҷумҳурӣ ҷиҳати пешгирӣ аз ин вирус тариқи васоити ахбори омма ва барномаҳои телевизионӣ роҳу усулҳои пешгирӣ аз ин бемории сироятӣ ба роҳ монда шуда истодаанд. Бо назардошти он, ки дар кишвари мо низ ин вирус ба қайд гирифта шудааст, Ҳукумати ҷумҳурӣ ҷиҳати пешгирии паҳншавии коронавирус чораҳои эҳтиётӣ андешида, шахсони гирфтори ин вирус ба карантин ва табобат фаро гирифта шудаанд. Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Амри худ аз ҳисоби маблағи фонди захиравии Президенти Ҷумҳурии Тоҷикистон дар муддати се моҳ ҷиҳати пардохти иловапулӣ дар ҳаҷми як маоши вазифавӣ ҳармоҳа ба музди меҳнати кормандони соҳаи тандурустӣ ва ҳифзи иҷтимоии аҳолӣ, ки дар муассисаҳои табобатӣ ва таҳти карантин қарор доштанд, ҷудо намуданд. Илова ба ин, Президенти Ҷумҳурии Тоҷикистон муҳтарам Эмомалӣ Раҳмон маоши вазифавии якмоҳаи худро ба суратҳисоби махсус, ки барои маблағгузории чорабиниҳои пешгирӣ ва мубориза бо коронавирус кушода шудааст, гузарониданд. Ин иқдомҳои Пешвои миллат барои таъмини кафолати иҷтимоии аҳолӣ, пешгирӣ ва табобатӣ беморӣ равона шудааст. Тавассути ахбори васоити омма ҳамарӯза иқдомҳои Ҳукумати Ҷумҳурии Тоҷикистон, вазорату идораҳо, соҳибкорони саховатпешаи бонангу ори миллат ба муассисаҳои тандурустии шаҳру ноҳияҳо ва вилоятҳо ҷиҳати пешгирӣ аз бемории мазкур маводҳои лозима ва хӯрока дастрас гардида истодаанд.
Имрӯзҳо дар шабакаҳои иҷтимоӣ гурӯҳҳои сиёсӣ ва фирории созмони террористии наҳзати исломӣ маводҳое паҳн мекунанд, ки саропо иттилооти дурӯғ буда, бо воҳимангезиҳои барзиёд сари мардумро гиҷ месозанд. Гурӯҳҳои ифротӣ, душманони миллат нисбати Тоҷикистони соҳибистиқлол аз хориҷи кишвар эродҳое мегиранд, ки фақат ба хотири ғаразҳои сиёсӣ, на ба хотири рушди давлати миллӣ ва тавонманд шудани миллати тоҷик мебошад. Эътирозҳо ва сухани гурӯҳҳои ифротӣ ё худ наҳзатиёни террористӣ ба амнияти миллии мо заррае ҳам таъсир расонида наметавонад. Суханони муғризонаву бепоя аз забони онҳо мунтазам садо медиҳанд, пучу бемағз буда, мардуми шарифи кишвар ба онҳо заррае ҳам бовар надоранд. Мушоҳидаҳо нишон медиҳанд, ки ашхоси бадхоҳ ва бадбин бо афкору ақидаҳои фитнаангез осудагии мардумро халалдор намуда, барои расидан ба мақсадҳои нопок аз фурсат истифода бурда, ҳар хел хабару ҳангомаҳои бардурӯғ паҳн менамоянд.
Ҷиҳати пешгирӣ аз вабои фарогир Ҳукумати Ҷумҳурии Тоҷикистон таҳти сарварии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, мақомотҳои маҳаллии иҷроияи ҳокимияти давлатӣ ва мақомотҳои дахлдор корҳои саривақтӣ ва чораҳои пешгирии сироятёбии коронавирусро амалӣ карда истодаанд. Барои ноил шудан ба пирӯзии комил дар мубориза бо вабои аср ва таъмини рӯзгори босаодати мардуми кишвар ҳар як фарди худогоҳу ватандӯст аз хурд то бузург вазифадорем, ки дар ин кори хайр саҳмгузор бошем. Умед ва боварии комил дорем, ки дар муддатҳои наздиктарин ин ваборо паси сар мекунем. Имрӯз дар шароити хеле мураккаби ҷомеаи шаҳрвандӣ ҳамаи мо сокинони ҷумҳурӣ ёру бародари ҳам бошем ва бо масъулияти баланди имониву инсонии худ нисбат ба саломатии худу пайвандон, инчунин ба тозагии муҳити зист аҳамият дода, дар ободонии манзил ва маҳалли худ, дар доираи омодагӣ ба ҷашни 30- солагии Истиқлолияти давлатӣ саҳми худро гузошта, дар пешгирӣ ва пушти сар намудани ин вабои аср ҳиссаи арзандаи худро гузорем. Мардуми шарафманди тоҷик ҳамаи мушкилиро мардонавор бартараф намудааст ва бемории сироятии коронавирусро низ ба хубӣ паси сар менамояд.
Муродов Раҳмон, мудири шуъбаи таблиғот, иттилоот ва матбуоти КИ ҲХДТ дар ноҳияи Носири Хусрав
