Миралиён Қиёмиддин Абдусалимзода 6-уми сентябри соли 1977 дар ноҳияи Вахш таваллуд шудааст. Соли 1999 Донишгоҳи давлатии омӯзгории Қӯрғонтеппа ба номи Носири Хусрав (имрӯза Донишгоҳи давлатии Бохтар)-ро бо ихтисоси омӯзгори фанни математика хатм мекунад. Фаъолияти меҳнатияшро аз соли 1999 то 2000-ум ба ҳайси ассистенти кафедраи алгебра ва геометрияи Донишгоҳи давлатии омӯзгории Қӯрғонтеппа ба номи Носири Хусрав (имрӯза ДДБ) оғоз кардааст. Солҳои 2000-2001 ба ҳайси сармутахассиси шуъбаи кор бо ҷавонони донишгоҳи мазкур, сармутахассиси шуъбаи кор бо ҷавонони шаҳри Қӯрғонтеппа (Бохтари имрӯза) фаъолият кардааст. Дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон солҳои 2001-2002 ба сифати мутахассиси Идораи сиёсати иҷтимоӣ, солҳои 2002-2006 ба ҳайси директори Маркази ҷумҳуриявии иттилоот ва тамоюли ҷавонон, сардори Идораи муносибатҳои байналмилалӣ, солҳои 2006-2007 сармутахассиси Раёсати кор бо ҷавонон, солҳои 2007-2008 мудири шуъбаи муносибатҳои байналмилалӣ, солҳои 2008-2012 мудири шуъбаи сиёсати иҷтимоӣ, солҳои 2012-2014 ба ҳайси муовини сардори Раёсати кор бо ҷавонон адои вазифа намудааст. Солҳои 2014-2015 дар вазифаи муовини раиси Кумитаи кор бо ҷавонон, варзиш ва сайёҳии назди Ҳукумати Ҷумҳурии Тоҷикистон фаъолият кардааст.
Миралиён Қиёмиддин Абдусалимзода аз 1-уми марти соли 2015 вакили Маҷлиси намояндагони Маҷлиси Олии Ҷумҳурии Тоҷикистон буда, айни замон бо розигии Асосгузори сулҳу ваҳдати миллӣ, Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон ба вазифаи раиси Кумитаи иҷроияи ҲХДТ дар вилояти Хатлон таъйин гардид.
Забонҳои русӣ ва англисиро хуб медонад. Доктори илмҳои сиёсӣ мебошад. Бо ҷоизаи ба номи Исмоили Сомонӣ мушарраф гардидааст. Оиладор соҳиби 5 фарзанд.
Шуъбаи иттилоот ва матбуоти
КИ ҲХДТ дар вилояти Хатлон
