ТЕМУРМАЛИК. Дар доираи Соли шинохти бештари манфиатҳои миллӣ. Вохӯрии навбатии кормандони Кумитаи иҷроияи ҲХДТ дар ноҳияи Темурмалик вобаста ба таблиғу ташвиқи Барномаи пешазинтихоботии ҲХДТ ва номзади он ба Маҷлиси Олии Ҷумҳурии Тоҷикистон ва Маҷлисҳои маҳаллии вакилони халқ дар ташкилоти ибтидоии Ҷамоати шаҳраки “Совет” баргузор гардид.
Зимни мулоқот роҳбарияти Кумитаи иҷроия дар бораи Паёми навбатӣ ва моҳияти Барномаи пешазинтихоботӣ суханронӣ намуда, иброз дошт, ки занону духтарон дар ҷомеаи имрӯзаи мо нақши фаъол дошта, дар аксари соҳаҳо, бахусус, дар бахшҳои иҷтимоӣ бештар кору фаъолият менамоянд. Ҳоло шумораи занон дар соҳаи маориф беш аз 70%, тандурустӣ ва ҳифзи иҷтимоӣ 67%, фарҳанг 51% ва дар сафи хизматчиёни давлатӣ 23,3% - ро ташкил медиҳанд.
Ҳамзамон мавсуф иброз намуд, ки ҲХДТ минбаъд низ дар самти сиёсати гендерӣ нақшаҳои мушаххасро пайгирӣ намуда, барои расидан ба баробарҳуқуқии воқеӣ байни занон ва мардон чора меандешад. Аз ҷумла, ташаббуси занону мардонро ҳамаҷониба дастгирӣ намуда, барои беҳтар кардани вазъи иҷтимоӣ, нақшу мақоми онҳо дар ҷомеа ва фароҳам овардани ҷойҳои нави корӣ тадбирҳои иловагӣ меандешад ва дар маҷмӯъ кӯшиш менамояд, ки онҳо ба сатҳи ҳарчи беҳтар ва шоистаи зиндагӣ муваффақ гарданд.
