Ҷ.БАЛХӢ. Дар доираи Соли шинохти бештари манфиатҳои миллӣ. Бо мақсади шарҳу тавзеҳи нуктаҳои Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии кишвар ва таблиғу ташвиқи Барномаи пешазинтихоботии ҲХДТ бо иштироки намояндагони ҳизбӣ дар ташкилоти ибтидоии «Зарафшон»-и Ҷамоати шаҳраки Балхии ноҳияи Ҷалолиддини Балхӣ вохӯрии навбатӣ баргузор гардид.
Масъулин дар бораи нуктаҳои асосии Паёми Пешвои миллат ва моҳияти Барномаи пешазинтихоботии ҲХДТ андешаҳои хешро баён дошта, афзуданд, ки саноатикунонии босуръатро ҳамчун ҳадафи чоруми стратегии кишвар қабул кардем, зеро рушди саноат барои таъмин намудани устувории иқтисодиёт, ташкили ҷойҳои нави корӣ, баланд бардоштани иқтидори содиротии мамлакат ва рақобатнокии он замина мегузорад. Дар натиҷаи тадбирҳои андешидашуда дар 7 соли охир ҳаҷми истеҳсоли маҳсулоти саноатӣ қариб 3 баробар (аз 10 миллиард сомонӣ ба 27,5 миллиард сомонӣ) ва ҳиссаи соҳа дар маҷмӯи маҳсулоти дохилии кишвар 5,1 банди фоизӣ (аз 12,6 ба 17,7 фоиз) зиёд гардидааст.
