ҚУБОДИЁН. Дар доираи Соли шинохти бештари манфиатҳои миллӣ. Дар ташкилоти ибтидоии “Табибон”-и ноҳияи Қубодиён ҷиҳати таблиғу ташвиқи барномаи пешазинтихоботии ҲХДТ, пешбарии номзади ҲХДТ ба Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ дар участкаи интихоботии №17-и Ҷамаоти шаҳраки Қубодиёни ноҳияи Қубодиён вохӯрӣ доир карда шуд.
Дар маҷлис раиси Кумитаи иҷроияи ноҳия ва дигар шахсони давъатӣ иштирок ва суханронӣ намуданд. Мавсуф дар суҳбат оид ба Анҷумани 13-уми ҲХДТ, ки санаи 13 декабри соли 2019 таҳти раёсати Раиси муаззами ҲХДТ муҳтарам Эмомалӣ Раҳмон бо иштироки 1917 вакил аз тамоми шаҳру ноҳияҳои ҷумҳурӣ баргузор гардид, сухан гуфта, ба ҳамагон маълумоти муфассал пешниҳод намуд.
Ҳамчунин, Барномаи пешазинтихоботии ҲХДТ, ки муҳимтарин самтҳои рушди иқтисодиву иҷтимоии кишвар дар солҳои 2020-2025-ро дар бар мегирад, баррасӣ шуд. Аз ҷумла қайд гашт, ки ҲХДТ, худ шарики фаъоли дигаргунсозиҳои сохтори давлатӣ ва шакли идоракунии ҷомеа мебошад, тавонист дар як давраи кӯтоҳи таърихӣ вазъи сиёсии кишварро ба танзим дарорад.
Раванди маъракаҳои муҳими сиёсӣ собит месозанд, ки ҲХДТ яке аз ҳизби бонуфуз дар тамоми қаламрави кишвар маҳсуб ёфта, бо ҷонибдорони худ як қувваи бузургро ташкил медиҳад ва ба сифати ташкилоти сиёсии ҷамъиятӣ дар тақдири халқи Тоҷикистон нақши муҳим мебозад.
